Luke 19

1Iesu i lulage Ieriko eai i baeawa ie lau. 2Tau esau esana Sakaio, ia takisi tau‐tanogogo tanuagadi, tau monamonaune. 3Ena gadosisi Iesu bena i ita: tatao se gamagari ariri nige ena abaitana, paana siarina ie kuu. 4I aitautau baguna oeagi sukamoa eai i hinae Iesu bena abo i ita paana nei dobila eai ne arinai abo i baeawa. 5Iesu ie lage wau dimo wa arinai, i sanalolosae tau wa ie ita, i ribalau ia arinai, i ene, “Sakaio e, u pesaheuheulama: wau ta em numa eai abo ea babawa.” 6Ia i pesaheuheula, i woeaisaei ena numa eai ma kodena. 7Isi abo se ita, gamagaridi se gadigadiguguei, si ene, “Ia i lau tau baabaaeana i aitaumania.” 8Sakaio i toro, i ribalau Guiau arinai, i ene, “Guiau e, egu gogo tupona abo ea mosei tatao gogogesagesa aridi eai: eo ena ginauri aisana ea abigaibuidi hari tau, hari tau, aridi eai ea boraidi, abo ea hemaisauioidi, ma hasi maisana ea helai.” 9Iesu i ribalau ia arinai, i ene, “Teina asubena ta mauri i lage teina numa eai ta, paana ia hinage Aberahama natuna esau. 10Paana ede Tau Natuna i laoma tatao se tauyamui i eooidi, eo i hemauridi.”

Parabole pauna saudoudoi: eo basileia sora nige se hetubu

Lk. 17.21; A. adi H. 1.6-8

11Teina riba ta se ataiedi, parabole esau abo i heribadi, paana ia Ierusalema i hanahanaui, eo isi edi nuatu hinage si ene, Eaubada ena basileia nige baeaona abo se hemasaraha. 12Arinai i ene, “Wasawasa esau i lau eanua esau eda lohaloha eai ena basileia esau bena i abi, eo i uioma. 13Ena heaheari tataodi saudoudoi i eogaidima, moni pauna saudoudoi i mosedi, i ribalau isi aridi eai, i ene, ‘Au hepaisoaei i lau e ea uioma.’ 14Ena eanua tataodi ia se ouyalayalaei, riba esau se laei ia arinai, si ene, ‘Tau ta nige ai henua ia ama tanuaga.’ 15Ia i uioma, basileia wa i abiyao, tatao, abo i lauhesomdi heaheari tataodi se eogaidima ia arinai, isi wa moni i mosedi wa, isi se uneune bena i itadi moni hisa se hetubudi. 16Tau baguna i laoma, i ene, ‘Guiau e, em pauna esega i hemala pauna saudoudoi.’ 17I ribalau ia arinai i ene, ‘I lolo ariri, oa heaheari lolona: em nuatu se dudurai, ginauri hisahisawaidi mo u komakomanidi, abo ea hetorom eanua saudoudoi oa tanuagadi eai u lau.’ 18Heaheari helabuina wa i laoma, i ene, ‘Guiau e, em pauna esega i hemala pauna haligigi.’ 19Hinage ia arinai i ene, ‘Oa abo se hetorom eanua haligigi tanuagadi eai u lau.’ 20Heaheari esau wa i laoma, i ene, ‘Guiau e, hage u ita em pauna meta: ea suma komakomani, ea totore ie ota; 21paana ea matausiem oa tau isuisupunapunana: eo em laulau enam u abigaibuidi mo, eo ginauri bena u tanogogoidi sora nige u lauhesuru.’ 22I ribalau ia arinai, i ene, ‘Oa heaheari tauna baaeana, oa awam eai abo ea hegirum. U nuatui eau tau isuisupunapunana, eo ginauri ea abi gaibuidi, eo ea tanotanogogo sora nige ea hesuru. 23Ie saha egu moni nige ue tore bank eai, ea uioma abo egu moni ea abi, eo hagahagadi hinage?’ 24Isi ia gegesina eai tau totoro i ribalau aridi eai, i ene, ‘Pauna esega wa au abi, abo au mosei tau wa pauna saudoudoi tau abina arinai.’ 25(Isi se ribalau ia arinai, si ene, ‘Guiau e, ia pauna saudoudoi i abidio.’) 26Paana ea heribamiu ta eai to eai enana ie abi, enana hinage abo se mosei: eai to eai nige ie abi enana begana abo se laeudoiei. 27Na isi, agu waiunuyao nige se henua eau bena tanuagadi, au woeaidima, au unuidi matagu eai.’”

28Ia i ribalau ina doha, abo i bagubagunaedi, se sae Ierusalema eai. 29Betepage eo Betania i hanahanauidi, tupi esau esana Oliveta arinai se lage, ena heaheatayao labui i hetamaridi. 30I ene, “Au lau eanua matamiu eai, au lage arinai asini natuna se hedai au ita, sora nige tau esau i bawasae arinai, abo au eairihai, au woeaiama. 31Ena tau esau i hesiowa, i ene, ‘Paana saha asini ne au eairihai?’ abo au riba ina doha, au ene, ‘Paana Guiau bena i abi.’” 32Isi se hetamaridi wa abo se lau, hinage se ita doha ena riba i ribaei. 33Asini natuna daina bena se earihai, tanuagana se ribalau aridi eai, si ene, “Asini natuna me sahana au eairihai?” 34Si ene, “Guiau bena i abi.” 35Abo se woeai se laei Iesu arinai, adi lulu se toresae asini natuna potana eai; abo Iesu se hebawasae potana eai. 36Ia ma launa adi lulu se lauweseauri dobila eai. 37Ia i lage hanahanau, Oliveta tupina abaleta‐dobina eai, ena heaheatayao moutuadi gamagamagari se kode, eo se arina lailai Eaubada se aihelahui, paana ana paisoa gigiboridi se itadio; 38si ene, “Wasawasa i lolo, ia i laoma Guiau esana eai: loni galewa eai, ma ana tepo i mia iniini puripurina eai!” 39Parisea tataodi headi moutuana boeadi eai se ribalau ia arinai si ene, “Tanuagamai e, em heaheatayao u ribasuuidi.” 40Ia arinadi i heuio, i ribalau aridi eai, i ene, “Ea heribamiu ta ena tatao ta se monomonou ta, weu ma esega abo se eabayabalaoma.”

Iesu Ierusalema sabina ie dou

Lk. 13.34-35

41Ia abo i lage hanahanau, eanua wa i ita, sabina ie dou. 42I ene, “Oa, ena oa u nuatui, teina em asubena ta ginauri se patulaoma em loni arinai! wau ta matam eai se tauyamiu. 43Paana asubena abo u hearodi, em waiunu hua lohaloha abo se sara hetaiirim, hari teha, hari teha se guduguduim, nige em abalulage. 44Se heasibuim, u hemalagonu, eo nanatumyao boeam eai hinage; nige we’u esau abo i ota we’u esau potana eai paana egu lagema huiana nige au nuatui.”

Dubu lailai se heaa ma helabuina

Mt. 21.12-16; Mk. 11.15-18; Io. 2.13-17

45Ia abo i awasae numa uura alona eai, isi tauuneunelau eo tauuneunelaoma nei eai i aiduiedi. 46I ribalau aridi eai, i ene, “Se uriyao, egu numa abauura ede: omi numa wa au abi i hemala tauaiaiyahari edi abamia.”

47Asubena gamagamagari i lauheata numa uura eai: kohena lailaidi eo tauuriuri tataodi eo eanua babadadi ia se eooi bena se unui. 48Edi nuatu si eooasa; paana tatao gamagaridi ena riba se gadosisiedi.